Корбан бәйрәме

Авылыбызда Корбан бәйрәме бик матур үтте.Рәмзи мәчетендә иртәнге намаздан соң имам Хөснулла хәзрәт халыкны бәйрәм белән котлады, һәр гаиләгә бәхет- шатлыклар, тынычлык һәм бәрәкәт теләде. Аннан соң Гает намазы укылды.Авылда корбан чалдыручылар да булды.Ашханәдә бәйрәм табыны әзерләнеп, мәҗлес үткәрелде.

Якты маяк син, Укытучым!

28 нче октябрь көнне авылыбызның мәдәният йортында шул исемдәге кичә үткәрелде. Якташыбыз язучы һәм шагыйрь , Гаяз Исхакый исемендәге премия лауреаты, филология фәннәре кандидаты, Татарстан Язучылар берлеге һәм журналистлар берлеге әгъзасы, Татарстанның атказанган мәдәният хезмәткәре Факил Сафинга багышланган бу кичә районыбызның мәдәният йорты директорлары һәм китапханәчеләрнең семинарында күрсәтелде. Очрашу кичәсенә шулай ук якташларыбыз Г.Тукай исемендәге Дәүләт бүләге иясе язучы Фоат Садриев, балалар шагыйре , А.Алиш премиясе лауреаты Мөҗәһит Әхмәтҗанов, районыбызда эшләп килүче "Зөлфәт" клубы җитәкчесе шагыйрә Лилия Садриевалар килде.
Кичәдән күренешләр

Просмотреть все

Получите собственный

Беренче җиңүебез

Татарстан Республикасы Мәгариф һәм фән министрлыгының "Белем.ру" җаваплылыгы чикләнгән җәмгыяте оештырган "Белем җәүһәрләре-2010" Халыкара интернет-проектлар бәйгесендә "Укучы- җәүһәр" номинациясендә блогыбыз II дәрәҗә Дипломга ия булды. Кунакларыбызга, матур теләкләрен җиткергән дусларыбызга, киңәшләре белән һәрвакыт ярдәм итеп торган Җәлилова Гөлназ Илсуровнага зур рәхмәтебезне ирештерәбез.

Сайлаулар үтте

2010 нчы елның 10 октябре тарих битләренә муниципаль берәмлекләрнең вәкиллекле органнарына сайлаулар көне буларак язылып калачак. Бу көнне бөтен Татарстан буенча сайлаулар узды. Мөслим муниципаль районы буенча 19 авыл җирлегеннән 151 депутат , Әмәкәй авылы җирлегеннән 7 депутат сайланды. Авылыбыз халкы сайлауларда актив катнашты. Бүгенге сайланган депутатларыбыз- җирлегебез халкының иң ышанычлы кешеләре. Халыкны борчыган мәсьәләләрне хәл итү өчен мөмкин булганнарның барысын да эшләрләр дигән теләктә калабыз.

Гомер көзләрегез аяз булсын!

Хөрмәтле өлкәннәребез! Кадерле әти-әниләребез, әби-бабайларыбыз! Сезне бәйрәм белән котлыйбыз. Гомер көзләрегез аяз булсын!
Өлкәннәр көне уңаеннан авылыбызда мәктәп һәм "Кояшкай" балалар бакчасы коллективлары лаеклы ялдагы хезмәттәшләрен хөрмәтләделәр. Өлкәннәр укучылар көче белән әзерләнгән концерт карадылар, бәйрәм чәй табыны янында дәвам итте. Җирле үзидарә һәм "Ык" агрофирмасының "Дуслык" бүлекчәсе җитәкчеләре авылдагы өлкәннәргә күчтәнәч пакетлар өләште.

Туган көнегез белән!

Бүген якташыбыз филология фәннәре докторы, профессор Заһидуллина Дания Фатих кызының туган көне.
Хөрмәтле Дания Фатиховна! Сезне гомер бәйрәмегез белән чын күңелдән котлыйбыз.Хезмәтегездә зурдан-зур уңышлар, ныклы сәламәтлек, гаилә бәхете, бетмәс-төкәнмәс энергия, шатлык-куанычлар телибез. Без Сезнең белән чиксез горурланабыз.
Алыгыз Сез бездән котлау сүзен,
Шушы булсын олы бүләкләр.
Тыныч тормыш белән шат яшәгез,
Озын гомер- безнең теләкләр.

Мине "татарин" дип языгыз!

2010 елның 14 октябреннән башлап 25 енә кадәр Бөтенроссия халык санын алу, ягъни җанисәп үткәреләчәк.Росстат кәгазьләренең бер генә пункты милләтебез өчен борчу тудыра. Сан алу кәгазенең 7 нче пункты кешенең милләтен билгеләячәк.
"Кадерле милләттәшләр! Олыгызга һәм кечегезгә- һәрберегезгә әйтәсе килгән сүзебез шул: зирәклек, җаваплылык һәм принципиальлек күрсәтегез- сан алуга битараф калмагыз! Сан алу кәгазен тутырганда бигрәк тә шуңа игътибар итегез: 7 нче пунктның "Ваша национальная принадлежность" дигән графасына үз кулыгыз белән ачык итеп, "татарин" я "татарка" дип языгыз яки яздырыгыз",- дип мөрәҗәгать итә Бөтендөнья татар конгрессы милләттәшләребезгә.

Яңа уку елы белән!

Бүген мәктәпләрдә беренче кыңгырау чыңлады. Мәктәптә узган Белем бәйрәмендә район мәгариф бүлегенең мәктәптән тыш эшләр үзәге директоры урынбасары Салахова Наилә Зәкиевна һәм район санэпидстанциясеннән Гүзәл Назгатовна, авыл җирлеге башлыгы Р.М.Шагалиев катнашты.

Рамазан айлары мөбарәк булсын!

Изге рамазан аенда ураза тотучылар өчен авыз ачтыру мәҗлесләре үткәрелә.Шундый ифтар мәҗлесе авылыбызның Рәмзи мәчетендә дә үткәрелде. Аны авылның мулласы Хөснулла хәзрәт оештырды. Авылдашларыбыз бу мәҗлескә бик теләп җыелдылар. Коръән сүрәләре укылды, вәгазь тыңланды.

Яр астында чишмә ага , челтер- челтер тавышы...

Җәй буе авыл халкы сусызлыктан интекте. Күп кешенең өйләренә кертелгән булса да, су урам колонкаларына да килеп җитмәде. Бигрәк тә өске урам кешеләре суга тилмерде.
Ярда электән үк халык су алган Кызыл яр чишмәсе бар иде.. Соңгы елларда чишмә файдаланылмый ятты. Муллагалиев Фикус чишмәне чистартып, су агарлык итеп ясады. Хәзер урамыбыз кешеләре рәхмәтләр укый-укый рәхәтләнеп су алалар.

Сайт кунаклары игътибарына

Авылыбызга багышланган блогка яңа бер бүлек өстәлде."Рәмзи мәчете" бүлегендә мәчетләр тарихы белән таныша аласыз. Гасыр башында авылда 3 мәчет була. Документларда 1811 нче елда гына 1 мәчет теркәлсә дә, 1762 нче елда ук яшәгән авылда мәчетнең булуы бәхәссез.

Шамкай бездә кунакта!

25 нче июль көнне мәдәният йортында авыл халкы рәхәтләнеп ял итте. Җырчылар Альбина Апанаева , Илгәрәй, биюче Алсу һәм Рәшит Шамкай катнашында зур концерт булды.Артистларның чыгышын халык бик яратып кабул итте. Мондый концертлар авылларда , бигрәк тә ерак районнарда ешрак булсын иде. Җыр-моңга сусаган халыкка бу заманда мондый чаралар бик кирәк.

Уракка төштеләр

Быелгы корылык бар кешене тирән борчуга салды. Авыл кешеләре су юклыктан зарлана. Яшелчә һәм бәрәңге бакчаларына карасаң, барысы да кызуга әлсерәп, көеп утыралар. "Быел бәрәңге булырмы?"- дип борчылабыз. Кырдагы игеннең бөртеге дә алтынга тиң. Шушындый кырыс һава шартларында игенчеләребез урып-җыю эшенә керештеләр. Быел да сынатмаслар, дигән ышанычта калабыз. Хәерле сәгатьтә , игенче!

Мәдәният яңалыклары

18 нче июль көнне авылның мәдәният йортында Казан дәүләт аграр университеты студентларының татар халык театры артистлары Рүзилә Җамалиеваның "Кичерә алсаң, кичер..."исемле мелодрамасын күрсәтте. Театрның режиссеры - Татарстанның атказанган мәдәният хезмәткәре Роберт Галиев. Аларның уйнауларын авыл халкы бик яратып кабул итте. Авыл җирлеге башлыгы Ринат Мирзаянович Шагалиев студентларга рәхмәт сүзләре җиткерде һәм тагын килүләрен теләп калды.

Әмәкәй авылына багышланган блогка рәхим итегез!

Хөрмәтле авылдашлар, блогыбыз кунаклары! Бүген авылыбызга багышланган блог ачылды.Без- Әмәкәй урта мәктәбенең "Туган як тарихын өйрәнү" түгәрәге әгъзалары, туган авылыбыз белән Сезне дә таныштырырга уйлыйбыз, хөрмәтле интернет гизүчеләр! Блог мәктәпнең Туган як музее материалларына нигезләнеп төзелде.Әмәкәй авылының үткәне, бүгенгесе, киләчәге белән кызыксынучылар даими укучыларыбыз булырлар дип ышанабыз. Монда сез авылыбызның тарихи үткәне, мәктәп, мәчет тарихы белән таныша аласыз. Күренекле авылдашларыбыз, шигырь, бәетләр иҗат итүчеләр турында да укый аласыз. Авылыбызга кагылышлы яңалыклар, фотолар урнаштырылып барылачак. Бу эштән Сез дә читтә калмагыз, авылыбыз тарихын язуда катнашыгыз. Хәерле сәгатьтә!